Міжнародны дзень роднай мовы адзначаецца ў свеце з 21 лютага 2000 года з мэтай садзейнічання моўнай і культурнай разнастайнасці. Сёння ў свеце больш за 6 тысяч моў, палова з іх пад пагрозай знікнення. Менавіта дзеля захавання тых моў, што знікаюць, ЮНЕСКА і аб’явіла дзень роднай мовы. Беларуская мова набыла статус дзяржаўнай 26 студзеня 1990 года ў адпаведнасці з Законам “Аб мовах у Рэспубліцы Беларусь”.
21 лютага ў чытальнай зале Навагрудскай раённай бібліятэкі ў Міжнародны дзень роднай мовы чытачы і яе супрацоўнікі прынялі ўдзел у беларускай дыктоўцы і віктарыне на веданне беларускай літаратуры і фальклору “Крыніца духоўнасці”. Дыктоўку чытала выкладчык Навагрудскага дзяржаўнага сельскагаспадарчага ліцэя Таўлуй Галіна Эдуардаўна. Дыктоўка была па тэме “Праўда-памяць”, яна стала цудоўнай магчымасцю праверыць сваю пісьменнасць, а таксама адчуць прыналежнасць да нашай беларускай мовы. Пазнавальнай была і віктарына, якая праведзена пазней і ўключыла заданні на вызначэнне аўтараў і твораў беларускай літаратуры, пытанні на веданне побыту беларусаў. Цікавым было і вызначэнне рэчаў з загадкавай скрыні, якія трэба было пазнаць па апісаным сказам з раманаў, аповесцей і казак. Гучалі песні і вершы ў выкананні мясцовых паэтаў Святланы Абдулаевай і Алеся Гоцкі.
