Напярэдадні Дня Перамогі бібліятэкар Брольніцкай сельскай бібліятэкі правяла на свежым паветры гадзіну памяці пад назвай «Памяць сэрца». Мерапрыемства прайшло ў маляўнічым лесе, дзе была арганізавана памятная выстава, прысвечаная ветэранам Вялікай Айчыннай вайны, якія пражывалі раней у Брольніцкім сельскім савеце.
Удзельнікі мерапрыемства, сабраўшыся ля вогнішча, дзяліліся ўспамінамі аб сваіх родных і ветэранах, распавядаючы пра подзвіг, які яны здзейснілі дзеля Радзімы ў ваенны час. У атмасферы сяброўства і павагі ўсе з задавальненнем пяклі на вогнішчы бульбу, спявалі песні і чыталі вершы на ваенную тэму.
Такое мерапрыемства не толькі ўмацавала духоўныя сувязі паміж пакаленнямі, але і дазволіла ўспомніць аб значнасці памяці і павагі да тых, хто змагаўся за мірнае неба над галавой.
