14 лютага ў Беларусі, як і ў многіх іншых краінах свету, адзначаецца Міжнародны дзень дарэння кніг – знамянальная дата для ўсіх кнігалюбаў. Напярэдадні свята Навагрудская раённая бібліятэка запрасіла навучэнцаў другога курса Навагрудскага гандлёва-эканамічнага каледжа на інтэрактыўны агляд літаратуры «Кніга – адзін з самых мудрых і каштоўных падарункаў».
Кніга – гэта частка нашай культурнай спадчыны. Яна аб’ядноўвае пакаленні, стагоддзямі перадаючы веды. Усё мяняецца з часам, але сіла ведаў застаецца ўсемагутнай! Кніга — гэта тая крыніца ведаў, з дапамогай якой магчыма знайсці адказ на любое пытанне. З яе дапамогай заўсёды можна атрымаць інфармацыю рознай ступені складанасці.
Кніга дапамагае нам жыць. У ёй утрымліваецца шматвекавая мудрасць аб прызначэнні чалавека ў свеце. Героі літаратурных твораў розных часоў вырашаюць для сябе вельмі важныя пытанні. Пра гэта і шмат іншае ішла гаворка падчас інтэрактыўнага агляду. Асобны акцэнт быў зроблены на пазітыўным уплыве кнігі на чалавека і яго стан.
Пазнавальна прайшла гульня “Літаратурная геаграфія”, дзе навучэнцы суадносілі пісьменнікаў з краінамі, якія яны прадстаўляюць. У гульні-анаграме “Адным словам” камандамі адгадвалі назвы кніг і мастацкіх твораў.
Была прадстаўлена вялікая колькасць твораў айчынных і замежных аўтараў, класічная і сучасная літаратура, серыйныя кніжныя выданні, бестселеры і навінкі бібліятэчнага фонду фонду.
Юнакі і дзяўчаты расказалі пра свае любімыя кнігі і літаратурныя густы.
Чытайце кнігі! Дарыце сабе і адзін аднаму радасць чытання!
