Бондар Юрый Паўлавіч прызначаны міністрам культуры Беларусі, да цяперашняга моманту ён працаваў на пасадзе рэктара Беларускага дзяржаўнага ўніверсітэта культуры і мастацтваў.
Даведка: Бондар Юрый Паўлавіч. Нарадзіўся 11 красавіка 1973 г. у горадзе Мінску. Скончыў у 1997 годзе юрыдычны факультэт Беларускага дзяржаўнага ўніверсітэта па спецыяльнасці правазнаўства, у 2007 годзе — інстытут дзяржаўнай службы Акадэміі кіравання пры Прэзідэнце Рэспублікі Беларусь па спецыяльнасці дзяржаўнае ўпраўленне сацыяльнай сферай.
У 2006 годзе абараніў дысертацыю на суісканне навуковай ступені кандыдата палітычных навук па спецыяльнасці «Тэорыя палітыкі, гісторыя і метадалогія палітычнай навукі» ў Акадэміі кіравання пры Прэзідэнце Рэспублікі Беларусь. У 2009 годзе пастановай Прэзідыума ВАК Рэспублікі Беларусь Бондару Ю.П. прысвоена навуковае званне дацэнта па спецыяльнасці «паліталогія«.
У Беларускім дзяржаўным універсітэце культуры і мастацтваў — з 2001 года, працаваў на пасадах выкладчыка, старшага выкладчыка, дацэнта кафедры культуралогіі, першага прарэктара. 28 лютага 2013 года прызначаны на пасаду рэктара ўстановы адукацыі «Беларускі дзяржаўны ўніверсітэт культуры і мастацтваў».
Юрый Бондар з’яўляецца аўтарам шматлікіх артыкулаў, дакладаў, навуковых публікацый, вучэбна—метадычных распрацовак.